ஆத்திரத்தை அடக்கினாலும்..

ரவை?

கிலோ 30 ரூபாய்.
ரேஷனில் இன்னும் குறையும்.


துப்பாக்கி?

தீபாவளிக்கு வாங்கியது.
மகளுக்கு.


புலி?

வீட்டில் பயன்படுத்துவது
புலி மார்க் புளி.


நவம்பர் 27?

கூட்டுத்தொகை 9.
நல்ல நம்பர்.


பிரபாகரன்?

முன்பு சத்யத்தில் இருந்தான்.
வேறெதிலோ இருக்கிறான் இப்போது.


தமிழ்..

உங்கள் கேள்விகளை நிறுத்துங்கள்.
அவசரமாய் ஒன்னுக்கு போகணும்.

ஹைக்கூ.

இறங்கும் வழியில்
ஏறினார்கள்.
ஏறும் வழி இல்லை.

-------------------------

மொட்டை மாடியில்
நிலவு நேரம்.
மீறித்தெரிந்தது
மூக்கின் உறுத்தல்.

திருஷ்டி.

என்னையும் மகளையும்
சுற்றிவைத்த சூடம்
எரிகிறது.

யார் கண்ணையாவது
எரிக்கும் வேளையில்
எங்களையும் எரிப்பார்கள்
வேறு வாசலில்.

கண்களிலிருந்து விடுதலை
சாத்தியமாக இல்லை.
கண்கள் துரத்தாத வாழ்வும்தான்.

'சூடம் நன்றாக எரிகிறதே'
எனப்பார்க்கும் கண்ணுக்கும்
சாத்தியமிருக்கிறது.

கையைஉதறுவதென்பது..

செடியுடன்
ஒரு வண்ணத்துப்பூச்சி.

இரை தருவதாய் சொல்லி
ஒரு ஜோடி சிட்டுக்குருவி.

கிடாயை சமாளித்து
தாயிடமும் சொல்லிவிட்டு
ஒரு ஆட்டுக்குட்டி.

இரவில்தானே மின்னுவேன்
என்றதற்கு
பரவாயில்லை என்று சொல்லி
ஒரு மின்மினியை.

எல்லாம் அழைத்துக்கொண்டு
ஒரு பொன்மாலைப்பொழுதில்
உன்னிடம் வந்தேன்.

நிமிர்ந்து பார்த்து
எழுதுவதை தொடர்ந்தாய்.
எதற்கோ உன் கையை உதறிய போது
உடன் வந்த எல்லாமும்
ஓடிப்போயின.

உன்னிடம் சொல்வதற்கு
ஒரு கவிதையும் இருந்தது.

திருவேங்கடா..!

ஒவ்வொருத்தராய் கொல்வதற்கு
சலித்துப்போனான்.
மொத்தமாய் குழியிறக்கி,
புல்டோசர் ஏற்றி...
ஆயிரமாயிரம் முற்றுப்புள்ளிகள்.

லட்சமாய்
அவலக்குறிகள்
முகாம்களில்.

எஞ்சியவை
கேள்விக்குறிகளாய்
புலம்பெயர்ந்து.

ஆச்சரியக்குறியாய்
உலகின் இறுகியமெளனம்.

இதையெல்லாம் செய்தவனின்
ஆண்குறியை
அறுத்தால் என்ன.

நிகழ்ந்து விடுமோ.

நாளை பற்றி
பேசிய ஒரு நாளில்தான்
நிச்சயமானது உனக்கு.

பின் வந்த நாட்களில்
நினைவுகளை கிழித்த படி
வீதியில் நடந்து வந்தேன்.

உன் வீட்டருகேயும்
வந்து விட்டேன் ஓர் நாள்.

காற்றில் பறந்த நினைவொன்று
உன் அழைப்பு மணி அருகே.

நீ
வந்து விடுவாயோ
என்ற பதட்டத்தில் நின்றேன்
நான்.

கவிதைத்துளிகள்.

நாம் சொல்லிக்கொடுக்கிறோம்
என்பதுதான் துரதிர்ஷட்ம்.
மற்றபடி பாக்கியவான்கள்
குழந்தைகள்.


-----------------------



உள்ளும் புறமும் சத்தம்.
மூடப்பட்ட கதவு.
ஆலயம்.