ஜெயபேரிகை.

21 தங்கம்,28 வெள்ளி, 26 வெங்கலம்-ஒரு சாதனை!

2010-10-17T12:48:00.007+05:30

15-10-2010 அன்று கமலா சுப்ரமணியம் பள்ளி,தஞ்ஞாவூரில் பள்ளிகளுக்கான மாநில அளவிலான நீச்சல் போட்டிகள் நடைபெற்றது. இதில் கலந்துகொண்ட SDAT(Sports Development Authority of Tamilnadu) திருநெல்வேலி மாணவர்கள் மிகச்சிறப்பாக செயல்பட்டனர். 21 தங்கம், 28 வெள்ளி, 26 வெங்கல பதக்கங்களை வென்று அனைவரின் பாராட்டையும் பெற்றனர்.

16 - 10 - 2010 ல் நடைபெற்ற விழாவில் அமைச்சர் மைதீன்கான் அவர்களால் பாராட்டப்பெற்றனர்.

புகைப்படத்தில் மாணவர்களுடன் அமர்ந்திருப்பவர் பயிற்றுனர் பிரேம்குமார் அவர்கள். அவரின் பயிற்சியும்,ஊக்கமும் துணைவர மாணவர்கள் தொடர்ந்து பல போட்டிகளில் கலந்து கொண்டு வெற்றிகளை குவித்து வருகிறார்கள். சரத் சடையப்பன், சேது மாணிக்கவேல், ஆதித்ய ஜுவாலா ஆகிய மாணவர்கள் தேசிய அளவிலான போட்டியில் கலந்து கொள்ள இருக்கிறார்கள் என்பது குறிப்பிடத்தகுந்த சாதனையாகும்.

சிறார்களின் பயிற்சியில் வள்ளி,மகாராஜன் ஆகிய பயிற்றுனர்கள் முக்கிய பங்கு வகித்து வருகிறார்கள்.

அண்ணா ஸ்டேடியம் என்று நெல்லை மக்களால் பரவலாக அறியப்படும் இடத்தில் அமைந்துள்ள நீச்சல் குளத்திற்கு வாய்ப்புள்ளவர்கள் நேரில் வந்தால் பலன்பெறலாம். நீச்சல் பயிற்சி மாணவர்களுக்கு சிறந்த உடற்பயிற்சியாக இருக்கிறது. ஆரோக்கியம் மேம்படுகிறது. போட்டிகளும்.பரிசுகளும்,சான்றிதழ்களும் வேறு!

இது, 2 தங்கம், 2 வென்கலப்பதக்கங்கள் வென்ற என் மகள் அமிர்தவர்ஷினி!

புத்தகம்.

2010-09-30T06:26:00.003+05:30

அலையும் மனசு

பக்கங்களுக்குள்

சிக்குவதில்லை

சில நேரங்களில்.

உலகைப்புறந்தள்ளி

எங்கோ சஞ்சரிக்கவும்

வாய்க்கிறது

சில புத்தகங்களில்.

முகம் மறைத்து

பிழைக்கவும் முடிகிறது

சிலரிடமிருந்து!

சரி!

ஒரு நல்ல மனிதனின்

வரவிற்குப் பின்

புத்தகத்தில் என்ன இருக்க முடியும்!

வேலுவின் பக்கங்கள்.

2010-09-17T11:26:00.002+05:30

கிருஷ்ணகிரி மாவட்டம்,போச்சம்பள்ளியில் அண்ணாஅறிவகம் பள்ளியில் +2 படித்த மாணவர் பள்ளி பேருந்து மோதி உயிரிழந்தார்.இதைத் தொடர்ந்து பள்ளியும் ,தாளாளர் வீடும் தாக்கப்பட்டது.இதைக் கண்டிக்கும் விதமாக மெட்ரிக் பள்ளிகள் இன்று மூடப்படும் என்று அறிவிக்கப்பட்டது.இது ஜனனாயக உரிமை என்றாலும்,காலாண்டுத் தேர்வு நடைபெறும் நேரத்தில் திடீரென்று நேற்று அறிவிக்கப்பட்ட விடுமுறை லட்சக்கணக்கான மாணவர்களை கருத்தில் கொள்ளாத நடவடிக்கை.

மெட்ரிக்பள்ளிகள் இயக்குனர் அரசின் சார்பில் கடும் நடவடிக்கை இருக்கும் என அறிவிக்க இன்று காலை ஆரம்பித்தது திண்டாட்டம்.7.45க்கு மகளை எழுப்பி அவசரமாய் கிளப்பி, விட்டு வந்தாயிற்று.இல்ல மத்த ஸ்கூல்லாம் லீவுதானாம் என்கிற வதந்தி தொடர்ந்தது.இருக்கும் மாணவர்களை கொண்டு பள்ளி தொடர்ந்து நடைபெறுகிறது.

பள்ளிக்கட்டணம் அரசால் நிர்ணயம் செய்யப்பட்டபின்புதான் இந்த தனியார்பள்ளிகள் சங்கம் தெரிய ஆரம்பித்திருப்பதும்,இது கோடீஸ்வரர்களின் சங்கம் என்பதால் கட்சிகளுக்கு single window collection point என்பதும் இதில் உள்ள அரசியல்.

அரசின் அறிவிப்பு

வருகிற 24ம் தேதி பாபர் மசூதி வழக்கில் தீர்ப்பு எதிர்பார்க்கப்படுவதால் அனைத்து தரப்பு மக்களும் அமைதியுடன் ஒத்துழைத்து நாட்டின்வளர்ச்சிக்கு உறுதுணையாய் இருக்கவேண்டும் என்ற செய்தி அரசால் வெளியிடப்பட்டுள்ளது.இது அரசின் பாராட்டத்தக்க முயற்சி.

ஒரு SMS

Marriage is an institution where a boy loses his bachelor degree when a girl gains her masters.

அழகு வழியுது!

2010-09-12T10:20:00.006+05:30

முகம் மறைத்த

விரல்களின் வழி

கசியுது நிலவொளி.

பொங்கி வரும்

உலையென!

பொங்கலோ பொங்கல்

என கூவத்துவங்குது மனசு!

யாராவது காப்பாற்றுங்கள்...! ப்ளீஸ்...!

2010-08-28T06:10:00.002+05:30

கதவிடுக்கில் நுழைந்திருந்த தினசரி கண்ணில் பட்டது.தூக்கத்திலேயே நடந்து மெதுவாய் கையில் எடுத்தேன்,வழக்கமான பரபரப்பு தொற்றிக்கொண்டது.வேகமாக புரட்ட ஆரம்பித்தேன். நான் தேடுவது அரசியல்,சினிமா,விளையாட்டுஅல்லது வணிகச் செய்திகள் அல்ல.எங்காவது நிகழும் 'தற்கொலைச்செய்திகள்!'.

தற்கொலைச் செய்திகள் ஏதாவது ஓரத்தில்தான் இருப்பதால்,பெரும்பாலும் தேட நேர்கிறது.சில நேரங்களில் 'ஆளின்' முக்கியத்துவம் பொருத்து பெரியதாகவோ கட்டம் கட்டியோ போட்டிருப்பார்கள்.அப்போது என் வேலை எளிதாகிறது.

இன்றைய செய்தி நான்காவது பக்கத்தில் சிக்கியது.இறந்தவனுக்கு சுமார் 30 வயதிருக்கலாம்.(உன் வயதுதான் இருக்கும். நீயெல்லாம்....என் மனசு சொல்ல ஆரம்பித்தது.)

இரயில் முன் பாய்ந்திருந்தான்.அடையாள அட்டையை வைத்து ஆளை கண்டுபிடித்திருந்தார்கள்.சென்னைக்கு அருகில்தான் அவன் வீடு. நேரில் போய் விடலாம்.

தற்கொலை பற்றிய செய்தியைப்பார்த்தவுடன் நேரே சென்று, உடல் அப்புறப்படுத்தப்படாத பட்சத்தில், மாலை அணிவித்து சம்பவம் பற்றிய முழு விவரங்களை அறிந்து வருவேன்.உடனடியாக முடியாவிட்டாலும் கூட குறித்து வைத்துக் கொண்டு வேறொரு நாள் சென்று வருவேன்.

என்னைப்பற்றி கொஞ்சம் சொல்ல வேண்டியிருக்கிறது!என் வயது 32.ஐ.டி. கம்பெனிகளில் 10 வருட அனுபவம். நல்ல வேலையும், சம்பளமும்.அக்கா,தங்கைக்கு சிறப்பாய் திருமணம் செய்து கொடுத்தாயிற்று.ஒரு தங்கை படித்துக்கொண்டு இருக்கிறாள்.தாய்,தந்தையர் நலமாய் சொந்த வீட்டில் இருக்கிறார்கள்.தங்கைக்கு அப்புறம் என் திருமணம் என முடிவு செய்திருக்கிறேன்.

'தற்கொலை' மீது என்னுடைய கவனம் எனக்கு 10 வயது இருக்கும் போது,தெருக்கோடியில் ஒருவர் மரத்தில் தொங்கியிருந்ததைப் பார்த்த போது ஆரம்பித்தது.அந்த வயதில் பயமாய் இருந்தது.உயிரைப் பற்றிய கேள்விகள் எழுந்து அதுவே பின் ஆர்வமானது.இப்பொழுது உயிரை விடுபவர்களை பார்க்கும் போது ஆச்சரியமாயிருக்கிறது.சிறு காயங்களுக்கே துடித்து போகும் மக்கள் மத்தியில்,உயிரை போக்கி கொள்ள எவ்வளவு மன வலிமை வேண்டும் என நினைத்துப் பார்க்கையில் ஆச்சரியம் அடங்க மாட்டாததாய் இருக்கிறது.

இரயிலில் அடிபட்டு இறந்தவனை பார்த்துவிட்டு திரும்பும் போது நண்பன் மொபைலில் அழைத்தான்.காத்திருந்த அவனையும் பிக் அப் பண்ணிக் கொண்டு புதிதாய் பிரபலமான ஸ்டார் ஹோட்டலுக்கு சென்றோம்.

நல்ல ருசியான சாப்பாடு.சீக்கிரம் முடித்தாக வேண்டிய ப்ராஜக்ட் பற்றியும் பேசிவிட்டு வெளியே வந்தோம்.

சுமார் 25 மாடிகளுக்கு பிரம்மாண்டமாய் இருந்த அந்த ஹோட்டலை அண்ணாந்து பார்த்தேன். நண்பனை அனுப்பி விட்டு நான் மட்டும் மேலே சென்று பார்க்க தீர்மானித்தேன்.

லிப்டில் நின்றிருந்த செக்யூரிட்டி வேலை முடியவில்லை,போகவேண்டாம் என்றான்.சரி என்று சொல்லிவிட்டு மேலே ஏறிவிட்டேன்.

அவ்வளவு உயரத்தில் இருந்து ஊரை பார்க்கவே பிரம்மாண்டமாய் இருந்தது!.காற்றின் வேகமும் பயமுறுத்தியது.

மெதுவாய் நடந்து விளிம்பிற்கு வந்தேன்.கீழே எட்டிப்பார்க்கையில் மனிதர்கள் சிறு புள்ளியாய் தெரிந்தார்கள்.

'குதி...! குதி...! குதித்துவிடு !' என உள்ளிருந்து ஒரு குரல் உந்தியது.

தங்கைகள், அவர்களின் குழந்தைகள்,வேலை, நண்பர்கள் எல்லாம் ஞாபகத்துக்கு வந்து முயற்சியை பின்னுக்கிழுத்தது.

மனதை சிரமப்பட்டுத் திருப்பி,திரும்ப எத்தனிக்கையில்,ஓரத்தில் இருந்த காலியான பேரல் ஒன்று உருண்டு வந்து....என்னைத் தள்ளியே விட்டது!

ஐய்யோ...! யாராவது காப்பாற்றுங்கள்...ப்ளீஸ்!

நடிகர்கள் தேர்தலில் நிற்கத் தடை!

2010-08-18T16:41:00.004+05:30

தேர்தல் தேதி அறிவிக்கப்பட்ட உடன் அரசாங்க நலத்திட்டங்களோ வேறு சலுகைகளோ அறிவிக்கக்கூடாது என்ற தேர்தல் கமிஷனின் சட்டம் நடைமுறையில் இருக்கிறது.வாக்காளர்களை ஒரு தலைப்பட்சமாக ஓட்டளிக்கத் தூண்டுவதை தடுக்கவே இச்சட்டம் இருக்கிறது.

நடிகர்கள் சினிமாவின் மூலம்,பொய்யான பிம்பங்களின் மூலம் நியாயமற்ற முறையில் மக்களை தூண்டத்தானே செய்கிறார்கள்.

ஓட்டளிக்கும் வயது வந்த ஒருவன் தாய்,தந்தை,குரு அல்லது நண்பன் இவர்களில் யார் பேச்சையாவது இரண்டு மணி நேரம் தொடர்ந்து கேட்பானா? ஆனால் மக்களை கட்டிப்போடும் சக்தி சினிமாவுக்கு இருக்கிறது.

இதைத் திட்டமிட்டு பயன்படுத்துபவர்கள் உளவியல்ரீதியாக பெரும் தாக்கத்தை ஏற்படுத்துகிறார்கள்.

காலையில் பள்ளிக்கூட நேரத்தில் ரோட்டின் குறுக்கே வண்டியை நிறுத்தி வைத்து ஒருவன் இடையூறு செய்யும் போது 'அவ்ர்' வந்து காப்பாற்றி விடுவார் என நம்பும் மக்கள் நிஜ வாழ்வில் பொது நலனுக்கு போராடும் டிராபிக் ராமசாமியை தோற்கடிக்கிறார்கள்.

நடிகர்களுக்கு சினிமா உருவாக்கும் பிம்பம் மற்றவர்களுக்கு கிடைப்பதில்லை.

வளர்ந்த கட்சிகளும் ஊடகங்களை தங்கள் வசம் வைத்துக்கொண்டு மாய பிம்பங்களை ஏற்படுத்துகின்றன.

தேர்தல் என்பது ஊடக பலம் உள்ளவர்களுக்கும்,இல்லாதவர்களுக்கும் இடையே நடக்கும் போது, உளவியல் ரீதியாக ஆராய்ந்து,முதலில் சொன்ன தேர்தல் கமிஷனின் சட்டம் சரி என்றால், நடிகர்கள் தேர்தலில் போட்டியிடுவது தவறுதானே

எந்ந்த்த்திரா...எந்ந்த்த்திரா...

2010-08-09T18:49:00.005+05:30

மலேசியாவில் பிரம்மாண்டமாய் நடந்த எந்திரன் ஆடியோ ரிலீஸை இரண்டு நாட்களாய் தமிழகம் கண்டுகளித்தது.சுமார் ஆறுமணி நேர ஒளிபரப்பின் விளம்பர வருவாயிலும்,ஆடியோ விற்பனையிலும் தனது முதலை எடுக்க ஆரம்பித்திருக்கிறது சன் நிறுவனம்.

'உசுரே போகுதே...உசுரே போகுதே...' போன்று கேட்டவுடன் பிடிக்கும் பாடலோ, 'கடாக் கறி அது அடுப்புல கெடக்கு' என்று வித்தியாசமாய் தாக்கும் பாடலோ இல்லை.

படம் வெளியானபின் ரஜினியால் பாடல்கள் மேலும் ஹிட்டாகலாம்.
-------------------------------------------------------------------------------------

ரிஸ்ட் வாட்ச் போன்று ஒரு உபகரணம் கட்டிய இடது கையை தாங்கிப்பிடித்து,காலை விந்தியபடி குகை போன்ற பகுதிக்குள் நுழைந்தான் அவன். சுருண்டு கிடக்கும் பாம்பை பார்க்கிறான். சிகப்பும்,பச்சையுமாய்,ஒரு வெப்ப உடலாய், ஸ்கேன் செய்ததுபோல் திரையில் தெரிகிறது.அந்த ஆப்பிரிக்க அமெரிக்கன் படுத்து விடுகிறான்.வெர்ச்சுவல் ஸ்கிரீனில் தோன்றும் ஒருவர் உன் சார்ஜ் குறைவாக உள்ளது என்கிறார்.

அவன் நினைவிலிருந்து காட்சிகள் விரிகின்றன.

ஒரு ஆய்வகத்தில்,ஒரு சேரில் ரோபோவாக.. வெளிப்புறம் வயரும், நட்டும்,போல்ட்டுமாக அமர்ந்திருக்கிறான்.
விஞ்ஞானி அவனுடன் பேசியபடி வெளிப்புறம் எப்படி இருக்க வேண்டும் என்கிறார்.டி.வி.யில் பேஸ்கட் பால் விளையாடும் 'ஜோர்டனை' அவன் காண்பிக்க 'குட் டேஸ்ட்' என்று சிரிகிறார்.

'சோலோ' என்று பெயரிடப்பட்ட அவன் ஒரு ஆயுதமாக உருவாக்கப்படுகிறான்.15 பேரின் பலம் அவனுக்கு உண்டு.சில பைபர்களை கொண்டு உருவாக்கப்பட்டதால் சிறு ஆயுதங்களால் பாதிப்பில்லை என்று விஞ்ஞானி விளக்குகிறார்.

படதின் பெயர் தெரியாமல் பாதியிலிருந்து டி.வி.யில் பார்த்த ஆங்கிலப்படமிது.முழுதும் பார்க்கவும் இல்லை.
-------------------------------------------------------------------------------------

Sydney Sheldon-ன் Tell Me Your Dreams நாவல் படித்திருக்கிறீர்களா.

அது ஒரு ‘அந்நியின்’ கதை. நமது விக்ரம் அந்நியன் என்றால் கதை நாயகி 'அந்நி' தானே!

Multiple Personality Disorderஐ பற்றிய சுவராசியமான கதை அது.படித்து பாருங்கள்.

திருடன்...போலீஸ்...மந்திரி..!

2010-08-07T11:07:00.007+05:30

சுமார் 35000/-கோடியில் நடக்கும் காமன் வெல்த் போட்டியில் ஊழல்.கல்மாடி சிக்கியிருக்கிறார்.

சொராபுதீன் கொலையில் குஜராத் உள்துறை மந்திரி அமித்ஷாவின் தொடர்பு பற்றி சி.பி.ஐ.விசாரிக்கிறது.

பீகாரில் 50 கொள்ளையர்கள் சேர்ந்து ரயிலில் கொள்ளை அடித்துள்ளனர்.

இவை சமீபத்திய செய்திகள்.

50 பேர் பங்கு வைச்சாங்கான்னா என்ன தேறும்? தப்பான business strategy! கொள்ளையர்களின் பாஸ் கவனிச்சு வேற பிளான் பன்னுங்க!கொஞ்சம் முயற்சி செஞ்சா மந்திரி ஆகிறலாம்!

அப்புறம்..சின்ன வயசில திருடன்..போலீஸ் ..விளையாடும் போது இந்த மந்திரிய ஏன் விட்டுடோம்னு தெரியல.இதுல விளையாடும் போது நாந்தான் போலீஸ்னு சண்டைகள் வேற!( நேர்மையாம்!)

இனிமேலாவது வெளையாட்டுல மந்திரிய சேர்க்கனும்!

கன்ஸ்யூமர் உலகத்தில் தெருவிளையாட்டுகள் தொலஞ்சி போச்சே!சரி..வீடியோ கேம்ஸ்களிலாவது மந்திரிகளுக்கு இடம் கொடுக்கவேண்டும்!

ஏய் ஞானம்...அப்பா ஞானம்...

2010-08-05T04:30:00.012+05:30

குறைந்த நுழைவுக்கட்டணத்தில்
அதிகக் கூட்டம்.

இந்த நகரில் மூன்று நாள் மட்டும்...

குவளை குவளையாய் ஞானம்
வழங்கப்பட்டது.

தவளைப்பெண்களின் நாக்கு
பொன்னிறமானது.

ஞான குருவின் ஒளிவட்டம்
ஒரு சுற்று பெருத்தது.

ஒரு குவளை பருகிய நான்
ஞானத்தில் ஊறிக்கிடந்தேன்.

கொடையாளர்களை தெரிந்த ஒருவன்
ஞானகுருவானான்.

ஆத்திரத்தை அடக்கினாலும்..

2009-11-28T07:11:00.002+05:30

ரவை?

கிலோ 30 ரூபாய்.
ரேஷனில் இன்னும் குறையும்.

துப்பாக்கி?

தீபாவளிக்கு வாங்கியது.
மகளுக்கு.

புலி?

வீட்டில் பயன்படுத்துவது
புலி மார்க் புளி.

நவம்பர் 27?

கூட்டுத்தொகை 9.
நல்ல நம்பர்.

பிரபாகரன்?

முன்பு சத்யத்தில் இருந்தான்.
வேறெதிலோ இருக்கிறான் இப்போது.

தமிழ்..

உங்கள் கேள்விகளை நிறுத்துங்கள்.
அவசரமாய் ஒன்னுக்கு போகணும்.

ஹைக்கூ.

2009-11-19T06:37:00.001+05:30

இறங்கும் வழியில்
ஏறினார்கள்.
ஏறும் வழி இல்லை.

-------------------------

மொட்டை மாடியில்
நிலவு நேரம்.
மீறித்தெரிந்தது
மூக்கின் உறுத்தல்.

திருஷ்டி.

2009-11-11T18:01:00.003+05:30

என்னையும் மகளையும்
சுற்றிவைத்த சூடம்
எரிகிறது.

யார் கண்ணையாவது
எரிக்கும் வேளையில்
எங்களையும் எரிப்பார்கள்
வேறு வாசலில்.

கண்களிலிருந்து விடுதலை
சாத்தியமாக இல்லை.
கண்கள் துரத்தாத வாழ்வும்தான்.

'சூடம் நன்றாக எரிகிறதே'
எனப்பார்க்கும் கண்ணுக்கும்
சாத்தியமிருக்கிறது.

கையைஉதறுவதென்பது..

2009-11-06T13:27:00.002+05:30

செடியுடன்
ஒரு வண்ணத்துப்பூச்சி.

இரை தருவதாய் சொல்லி
ஒரு ஜோடி சிட்டுக்குருவி.

கிடாயை சமாளித்து
தாயிடமும் சொல்லிவிட்டு
ஒரு ஆட்டுக்குட்டி.

இரவில்தானே மின்னுவேன்
என்றதற்கு
பரவாயில்லை என்று சொல்லி
ஒரு மின்மினியை.

எல்லாம் அழைத்துக்கொண்டு
ஒரு பொன்மாலைப்பொழுதில்
உன்னிடம் வந்தேன்.

நிமிர்ந்து பார்த்து
எழுதுவதை தொடர்ந்தாய்.
எதற்கோ உன் கையை உதறிய போது
உடன் வந்த எல்லாமும்
ஓடிப்போயின.

உன்னிடம் சொல்வதற்கு
ஒரு கவிதையும் இருந்தது.

திருவேங்கடா..!

2009-10-31T17:57:00.001+05:30

ஒவ்வொருத்தராய் கொல்வதற்கு
சலித்துப்போனான்.
மொத்தமாய் குழியிறக்கி,
புல்டோசர் ஏற்றி...
ஆயிரமாயிரம் முற்றுப்புள்ளிகள்.

லட்சமாய்
அவலக்குறிகள்
முகாம்களில்.

எஞ்சியவை
கேள்விக்குறிகளாய்
புலம்பெயர்ந்து.

ஆச்சரியக்குறியாய்
உலகின் இறுகியமெளனம்.

இதையெல்லாம் செய்தவனின்
ஆண்குறியை
அறுத்தால் என்ன.

நிகழ்ந்து விடுமோ.

2009-10-28T04:41:00.002+05:30

நாளை பற்றி
பேசிய ஒரு நாளில்தான்
நிச்சயமானது உனக்கு.

பின் வந்த நாட்களில்
நினைவுகளை கிழித்த படி
வீதியில் நடந்து வந்தேன்.

உன் வீட்டருகேயும்
வந்து விட்டேன் ஓர் நாள்.

காற்றில் பறந்த நினைவொன்று
உன் அழைப்பு மணி அருகே.

நீ
வந்து விடுவாயோ
என்ற பதட்டத்தில் நின்றேன்
நான்.

கவிதைத்துளிகள்.

2009-10-26T06:39:00.003+05:30

நாம் சொல்லிக்கொடுக்கிறோம்
என்பதுதான் துரதிர்ஷட்ம்.
மற்றபடி பாக்கியவான்கள்
குழந்தைகள்.

-----------------------

உள்ளும் புறமும் சத்தம்.
மூடப்பட்ட கதவு.
ஆலயம்.

ஒழிந்து போகட்டும்!

2009-10-24T06:40:00.000+05:30

சட்டமிடப்பட்ட
சவவாழ்க்கை.

எப்போதேனும் விழுகிறது
சாரலோ
ஒளிக்கீற்றோ.

பெருமழை பெய்யினும்
தீயே பற்றியும்
சட்டமுடைத்தா வெளியேறுகிறது
வாழ்க்கை?

நாங்கள் மொத்தமும்
சவக்கூட்டமாய் ஆனபின்பு
இதைப்பற்றி பேசியென்ன.
சொல்லிப்போனான்
ஈழத்தமிழன்.

விண்கல் மோதட்டும்
உங்கள் புவி மீது
என்றும் சொன்னான்.

கடல் ஊர்புகும்.
தூசு மண்டலமாய்
எங்கும் இருள் சூழும்.

அப்புறம்
புதிய உயிர் தோன்றுமோ!

என் வழி.

2009-10-22T11:11:00.000+05:30

வாழ்க்கை புறந்தள்ளிப் போக
நடுத்தெருவில் நிற்கும் நிலை
அநேகருக்கு நேர்கிறது.

நானும் நின்றேன் ஓர் நாள்.

பயணச் சீட்டு இல்லாதவன்
போய்க்கொண்டுதான் இருந்தான்.

வழி தெரியாது பயனித்தவன்
வழி சொல்லிப் போனான்.

எல்லைக்கோட்டருகே
ஆமைகளைப் பார்த்தபோது
மூச்சிரைத்தது எனக்கு.

சாதுர்யம் கற்று
கனவுகளைத் தொலைத்த
ஓர் கணத்தில் தென்பட்டது
எனக்கென ஒரு வழி.

ஹைகூ 2

2009-10-15T10:33:00.000+05:30

மழை ஓய்ந்த பின்னும்
சட்டென்று பெருந்துளிகள்.
காற்றில் ஆடும் மரம்.

------------------------

மின்னி மறைந்து
தாழப் பறந்தது
மின்மினி.
அவள் கண்கள்.

ஹைகூ.

2009-10-14T14:41:00.000+05:30

சுத்தமாய் அறை.
கட்டிலின் கீழ் குப்பை.
மனசு.

------------------------

காலில் சுட்டது
நசுக்காத சிகரெட்.
(மத)பேச்சுவார்த்தைகள்.

காதல்

2009-10-08T11:38:00.000+05:30

சிலர் சைவம்.
சிலர் அசைவம்.

சிலருக்கு வான்.
சிலருக்கு மண்.

சிலருக்கு நெருஞ்சி.
சிலருக்கு காக்காமுள்.

நிறைய ஆய்ந்தும்
நிறைவுறாத ஆய்வு.

விபத்து.
இருப்பினும்
பெட்டிச்செய்தி அல்ல!

காலம் காலமாய்
நடக்கும் கண்கட்டு வித்தை.

உணர்ந்தவரெல்லாம் சொன்னபின்பும்
பொழிப்புரை தேவைப்படும் இலக்கியம்!

அது, அதுவானால்
அதுவே சொல்லும்
ஆன்மீகம்!

ர(ரு)சித்தது!

2009-10-03T10:15:00.000+05:30

பிறந்து விழுந்தவுடன்
நடக்கத் துவங்கியதை
அதிசயமாய் பார்த்ததுண்டு.

விளிம்புகளில் ஓடுவதில்
உடலின் பளபளப்பில்
லாவகமாய் உடல் வளைத்து
அந்தரத்தில் தாவுவதில்
மனசெல்லாம் கரைந்ததுண்டு.

தாயைச் சரியாக கண்டு
முட்டிப் பால் குடிக்கும்
மந்தையில் ஒருவனாய்
நின்றதுண்டு.

காதணி விழா ஒன்றில்
குறும்பாட்டுக்கறியை
ருசித்த நாள்வரை
மனதில் இருந்தன
ஆட்டுக்குட்டிகள்!

உயிர் இருந்தால் மட்டும் போதுமா..?/உயிர் போனால்தான் பிணமா..?

2009-09-28T14:45:00.000+05:30

இறப்புக்கு முந்தைய மக்களை வாழ்பவர்கள்,பிழைப்பவர்கள் என இருபிரிவாக்கலாம்!
மன நலம், உடல் நலம், சமூகக்குழுக்கள், சமுதாய அளவுகோல்களின்படி பாராட்டத்தக்க வாழ்க்கை போன்றவற்றை தன் மனதிற்கு இனியவகையில், சமுதாய நெறிகளுக்கும் உட்பட்டு , அடைந்தவர்களை "வாழ்பவர்கள்" எனக்கொள்வோம். (இதில் மிகச் சொற்பமானவர்களே அடங்குவர்!)

நெறிமுறைகள் எதுவுமின்றி அங்கீகாரத்தையும், பாராட்டுதல்களையும் அடைபவர்களையும், (கெட்டிக்காரம்ப்பா...!பிழைக்கத்தெரிஞ்சவம்ப்பா..!) ஏதோ போய்க்கிட்டுஇருக்கு என் ஒரு சூழலில் உழல்பவர்களையும் "பிழைப்பவர்கள்" எனக் கொள்வோம்!

(இதில்தான் அநேக கோடிப்பேர்!)

வாழவும் தெரியாமல், பிழைக்கவும் முடியாமல் மனநோயாளியாய் இருப்பவர்கள் ஒரு பிரிவு!

பிழைக்க வழியின்றி, மனநோயாளியாகவும் ஆகாத ஒரு நிலை இருக்கிறது! உட்லைச் சுமந்து திரியும் நிலை!

முகாம்க்ளில் வதைபடும் தமிழர்களின் நிலை இப்படித்தான் இருக்கிற்து!

ரை இல்லை. இட நெருக்கடி, திடீரென வந்து போகும் தண்ணீர் லாரிகள், வீசியெறியப்படும் உணவுப்பொட்டலங்கள், கண்னெதிரே இறக்கும் உற்வுகள்..!

ஒரு மாட்டை வண்டிக்காரன் வதைத்ததைப் பார்த்த போதே ஒரு ஆங்கில எழுத்தாழனுக்கு மனப்பிறழ்வு ஏற்பட்டதாம்! இத்தனையையும் அனுபவித்த மக்கள் எதிர்காலத்திற்கானஎந்த நிச்சயமும் இன்றி உடலைச் சுமந்து திரிகிறார்கள்!

பிரபாகரன் கொல்லப்பட்டதாய் செய்தி வந்த அன்று, லண்டன் வாழ்பெண் ஒருவர் "ஒரு இனமே அழிக்கப்படுகிறதே..! கேட்கவே ஆளில்லை..! இருந்த ஒரு தலைவனையும் கொன்னுட்டாங்க..! என்ன கொடுமை இது..!" என்று கதறினார்.

"பொங்கு தமிழர்க்கு இன்னல் விளைத்தால் சங்காரம் நிஜமென்று சங்கே முழங்கு!" -என்றான் பாவேந்தான்.

போரெல்லாம் கூட வேண்டாம். இருக்கும் அரசியல் அதிகாரத்தைக் கூட பயன்படுத்தவில்லையே நாம் !

மக்கள் ஈராக்கிலும் இப்படித்தான் கொல்லப்பட்டார்கள். காஷ்மீர், இஸ்ரேல் எங்கும் யுத்தம் முடிவதாய் இல்லை.

தீவிரவாதத்தையும் நம்பாமல், சுயலாப அரசியல் கோமாளிகளையும் சாராமல் உலக மக்கள் யாவருக்குமான அதிகாரமும், செயல்பாடும் கொண்ட மக்கள் அமைப்பு சாத்தியமாகுமா !

எப்படித்தான்../திரும்பிவரும் எதுவும்..

2009-09-28T14:44:00.001+05:30

கண்ணு ஒளி எரிச்சதோ..
செவ்வொதடு கடிச்சதோ..

சின்ன இடை வெட்டிச்சோ..
நடை அழகு மிதிச்சதோ..

எப்படித்தான் செத்துச்சோ..
உசிரோடு இருந்த எம்மனசு.!
----------------------------------------------------------

அழுவதையும்

அடம்பிடிப்பதையும்

விட்டுவிடத்தான் நேர்கிறது..

அப்புறமென்ன..!

ஆறுதல்களுடனும்

தேறுதல்கள்டனும்

தொடர்கிறது வாழ்க்கை.

பின் ஒரு நாளில்

தேடி எடுத்தோ

சட்டென்றோ

தொலைந்தவை எதிர்ப்படலாம்

ஆனால் திரும்பி வரும் எதுவும்

பழையது போல் இருப்பதில்லை !

பசங்க /ஸ்லம் டாக் மில்லியனர்.

2009-09-28T14:43:00.001+05:30

ஆனந்த விகடனில் வந்த 52 மார்க், இன்னொரு இதழில் வெளிவந்த இயாக்குனரின் பேட்டி,T.V.ரேட்டிங் எல்லாம் பசங்க படம் பார்க்கும் ஆவலை தூண்டியது..

எளிமையும்,கதைகளத்தை தாண்டாத திரைக்கதையும் மிக முக்கியமாய் குறிப்பிடவேண்டியது.திரைக்கதையில் லாவகம் இருக்கிறது.தனி காமடி டிராக்,கிளாமர் டிராக் போன்ற தந்திரங்கள் இல்லை.அந்த வாத்தியார் கேரக்டர் மனதில் நிற்கிறது.எதிர் வீட்டு பையனை அடிப்பது,சண்டையின் போது 'வீட்டை விட்டு காலி பண்றேன் பார்' என்பது..கவனிக்க வேண்டிய காட்சிகள்!அந்த கேரக்டர் கம்பீரமாக படைக்கப்பட்டிருந்தாலும் ,ஹீரோ வொர்ஷிப் இல்லாதபடி இயல்பாய் இருக்கிறது.இயக்குனரிடம் எதிர்பார்க்கலாம்!

ஆரம்ப காட்சியில் ஒரு 'ஸ்டார்ட்' க்காகவும், மனதில் நிற்க வேண்டும் என்று இறுதிகாட்சியின் நீளத்திலும் கொஞ்சம் 'சினிமா' இருக்கிறது.மொத்தத்தில் இதுவும் உறுத்தாத குறைதான்.

'ஸ்லம் டாக் மில்லியனர்' படமும் பார்த்தேன்.இந்தியாவை அவமானப்படுத்தியது தவிர வேறென்ன இருக்கிறது அதில்?!உண்மையான நிலை சிறிது இருந்தாலும் கமர்சியலாகத்தான் கையாளப்பட்டுள்ளது.

டெக்னிகல் விசயங்கள், 'ஒன் லைனரை' பிரமதமாக்கும் திரைக்கதை,ஸப்டில் ப்ளே..எல்லாம் நமக்கு கைவந்து விட்டது!ஆஸ்கர் போன்ற விருதை அதன் சகல விளம்பரங்களுடன் உருவாக்கி மற்றவர்களுக்கு நாம் கொடுக்கலாம்!

அவஸ்தை..

2009-09-28T14:42:00.001+05:30

அவஸ்தை...

அவளின்

கொலுசொலியில்

நிமிர்ந்து,

கண்னொளியில்

கவிழ்வது!
----------------------------------------------------------------------

ஏன்..

ஏன் கண் எறிந்தாய்?

என் மனக்குளத்தில்

பேரலைகள்..

வாழ்க்கை வசப்படுமா...

2009-09-28T14:40:00.000+05:30

"வாழ்க்கை என்பது என்ன என்று தெரிவதற்குள் பாதி வாழ்க்கை கடந்துவிடுகிறது" எனவும் "25 வயதில் உலகமே நம்மைப் பார்ப்பது போல் தோன்றும்..,30 வயதில் உலகத்தை நாம் தெளிவாகப் பார்ப்பது போல் தோன்றும்..,60வயதில்தான் உலகத்தில் ஒருவருமே நம்மைப் பார்க்கவில்லை எனப் புரியும்.." எனவும் படித்தேன்

இதைப்போல் ஆயிரமாயிரம் சிந்தனைகள் இருந்தாலும் ,'இதுதான் வாழ்க்கை' என்ற உறுதியான வரையரை ஒன்றும் இல்லை.இந்த வரையரை அற்ற தன்மைதான் வாழ்க்கையை சுவராசியமாக்குகிறதோ..?!

'எல்லாம் மனசுலதான் மாமூ!'-என டாஸ்மாக் வாசலில் இருந்து 'ஆட்டிட்யூட் இஸ் இம்பார்ட்டன்ட்!'-என கார்ப்ரேட்ஸ் வரை மனப்பாங்கே வாழ்வைத் தீர்மானிக்கிறது என அனைவரும் அறிகிறோம்!

மன ஓட்டத்தை நீரோட்டத்துடன் ஒப்பிட முடியாது. நில்லாமல் ஓடினாலும் பெரும்பாலும் இரு கரைகளுக்கிடையே ஓடுகிறது.வெள்ளம், நீர்வீழ்ச்சி,சுழல் என சில வடிவங்களே எடுக்கிறது.ஆழ்மனதை வேண்டுமானால் கடலுடன் ஒப்பிடலாம்!காற்றுடன் ஒப்பிடுவது ஓரளவு சரியாக இருக்கும்.வியாபித்துள்ள தன்மை,இன்றியமையாமை,ஆற்றல்.வேகம் என காற்றோட்டமும்,மனஓட்டமும் ஒத்துப்போகிறது!

மனதுதான் வாழ்க்கைக்கான அடிப்படை எனத் தெரிந்தும் வீட்டிலும் பின் பள்ளி, கல்லூரிகளிலும் அதைப்ப்ற்றிய அறிவு,செயல்முறைகள் என எதுவும் நடைமுறையில் இல்லை.தினசரி நடவடிக்கைகள்,பேசும்,பழகும் முறைகளை நெறிப்படுத்துவதன் மூலம் மனதை நெறிப்படுத்தலாம் என்ற 'ரிவர்ஸ் பிராஸஸ்' பின்பற்றப்படுகிறது!

ஆன்மிக வழிபாடுகள்,சடங்குகள் எல்லாம் இந்த ரிவர்ஸ் பிராஸஸ்தான்.இதில் தியான முறைகள் நேரடியாக மனதைப் பற்றி பேசுகின்றன.

மனதை கட்டுக்குள் வைத்து வாழ்வை வசமாக்குவது இருக்கட்டும்..,யதார்த்த உலகில் பிழைக்கவாது வேண்டுமே!

பொருளாதாரம் ஒன்றுதான் வாழ்க்கையைத் தீர்மானிக்கும் முக்கிய காரணியாக இருக்கிறது.'உலகப் பொருளாதாரம்' நடைமுறைக்கு வந்த பின்பு, கடந்த 15 வருடங்க்ளில் நம் பொருள் சார்ந்த வாழ்வு பெரும் மாறுதலுக்கு உட்பட்டுவிட்டது.கன்ஸ்யூமர் யுகத்தில் பொருள்களை வாங்கிக் குவிக்கிறோம்!மனிதர்களைப் பயன்படுத்தவும்,பொருள்களை மதிப்பதுமான ஒரு நிலை வந்து விட்டது!

டி.வி.சேனல்கள், மொபைல் போன்கள்,கம்ப்யூட்டர்கள் போன்றவை மனித உறவுகளுக்கிடையே பெரிய மாற்றத்தை ஏற்படுத்த வல்லதாய் இருக்கின்றன.

தனிக்குடித்தனங்கள்தான் வாழ்க்கைமுறையாகிவிட்டது.மாணவர்களிடமும் தெருவுக்கு தெரு காணப்பட்ட குழுக்களும்,விடுமுறையில் விளையாடும் விளையாட்டுக்களும் மறைந்து போய்கொண்டிருக்கின்றன!

இந்த மாற்றங்களை விரைவாக உள்வாங்கிக்கொண்டு அதற்குத் தகுந்த வாழ்க்கை முறையை
நமது குழந்தைகளுக்கு அமைத்துத் தரும் கடமை நமக்கு இருக்கிறது!

தகவல்புரட்சி யுகத்தில் இருந்தாலும் தனிமனித நெறிகளும்,வாழ்க்கைக்கான மதிப்பீடுகளும் முக்கியமல்லவா?!

நாம் இதை உணர வேண்டும்! நம் குழந்தைகளுக்காவது வாழ்க்கை வசப்படட்டும்!

கோலங்கள்.

2009-09-28T14:36:00.000+05:30

நெடுஞ்சாலை நடுவில்
நீளும்
வெள்ளைக் கோடுகள்.
நீ இட்டது போல்
நேர்த்தியாய் இருக்கிறது!

_________________________

முன் நெற்றியிலோ
புடவைத்தலைப்பிலோ
எப்பொழுதேனும்
காணக்கிடைக்கும்
கோலப்பொடித் தீற்றல்
உன்
கோலங்களை விட
அழகு பெறுகிறது!
__________________________

புள்ளிகளால்
கம்பிகளால்
வண்ணங்களால்
படைக்க இயலாத
மற்றொரு
அழகிய கோலம்
நீ மட்டுமே!
_________________

புள்ளிகள் இட்டு
கம்பிகள் இழுத்து
நடுவில் பூவும் வைத்து
நிமிர்கையில்
என்னைப் பார்த்தாய்!
இப்போது
அந்த பூவும், நானும்
சிறைக்குள்!

தொலைவில் நிற்பது!

2009-09-28T14:35:00.001+05:30

தேர்தலில்
வாக்காளன்
தொலைவதை விடவும்

புகழ் ஒளியில்
ஆசிரியன்
தொலைவதை விடவும்

தேவைகள் முற்றானபின்
நண்பர்கள்
தொலைவதை விடவும்

வைபவஙகளில்
உறவுகளின ஆதிக்கத்தில்
அன்பானவன் தொலைவதென்பது
துக்ககரமானது.

ஆனால் எங்கும்
நிகழ்வது!

இவர்களின் பார்வையில் வாழ்க்கை.

2009-09-28T14:33:00.000+05:30

தலகீழா பொறக்குறான்...தலகீழா நடக்குறான், ஆடாத ஆட்டமெல்லாம் போட்டவங்க மண்னுக்கள்ளே...,என்று
எத்தனை பாடல்கள் வாழ்க்கையப் பற்றி.
வாழ்க்கை தத்துவங்களிலோ,பாட்ல்களிலோ இல்லை.அனுபவம்தானே வாழ்க்கை!

ஒரு நான்கு பேர் ,அவர்களின் அனுபத்தை பாடமாக்கினால்..

கசாப்புக்கடைக்காரர்:
கண் பார்க்கனும்,கை செய்யனும்! கத்தி படபடன்னு விழனும்..எப்ப வேணா கைல படலாம்.பயந்தா பொழைக்க முடியுமா?வெட்டி பொட்டலம் போட்டு போய்க்கிட்டே இருக்கனும்!

டீ மாஸ்டர்:
சர்க்கரை கம்மியா இருக்கிற டீக்கு சர்க்கரைய அடையாளமா வைக்குறோம்.அது மாதிரிதான்.பார்க்க ஒன்னா பழக ஒன்னா இருப்ப்ங்க..ஆராய்ச்சி எல்லாம் பண்னாம சூடா டீ சாப்பிட்டமா..,எடத்த காலி பண்னமானு போய்க்கிட்டே இருக்கனும்.

மெக்கானிக்:
ஒவ்வொரு வண்டியும் ஒவ்வொருத்தருக்கு செட்டாகும்! பள்ளம் வந்தா கியர டவுன் பண்னி, நல்ல ரோட்ல வெரட்டி போகவேண்டியதுதான்.மெய்ன்டெனென்ஸ் வேணும் சார்!

பலூன் விற்பவர்
இந்தா சார்.. நீயும் ஊது, நானும் ஊதுறேன்! உன் மூச்சு.என் மூச்சுன்னு என்ன வித்தியாசம் இருக்கு!கட்டு டைட்டா இருக்கிற வரைக்கும் காத்து இருக்கும்,காத்து இருக்கிற வரைக்கும் பிள்ளைகள் விளையாடும். நாமளும் இருக்கிற வரைக்கும் அடுத்தவங்கள சந்தோஷமா வைச்சுட்டு கிளம்ப வேண்டியதுதான்..

எழுதக்கூடாத கவிதை.

2009-09-28T14:32:00.000+05:30

மனதின் ஈரத்தில்
முளைத்து எழுந்தது
அந்தக் கவிதை.

மரபை மீறியதென்று
மாமக்கள் சினந்தனர்.
எச்சரித்தனர்.
வாள் கொண்டு கிழித்தனர்.

காயங்கள் ஆறிய
என் கையிலும் இருக்கிறது
கூரிய வாள்!

மனதின் ஓரத்தில்
அந்தக் கவிதையும்!

பொருளிலார்க்கு.

2009-09-28T14:30:00.000+05:30

பசுவும்,பாண்டமும்
மனிதனை அளந்தது
ஆரிய காலம்.

பொன்னும் பொருளும்
அதையே செய்யும்
நவீன காலம்.

இருப்போர்
இரங்குவதிலை.
இல்லாதோர்
நிமிர்வதில்லை.

மனிதம் வாழ்வதாயில்லை.
எக்காலத்திலும்.

எத்தனை கோடி சவங்கள்!

மு.க.அழகிரி பார்லிமெண்டில் பேசுவாரா?..ஜெ கேள்வி:

2009-09-28T14:29:00.000+05:30

தமிழில் பேச வழியில்லாததால் மு.க.அழகிரி தமிழில் பேசவில்லை.தொன்மையான மொழியான தமிழில் பேச கருனா நிதி ஏன் போரடவில்லை ..,அவர் பேசாமல் இருப்பதே நல்லது என நினைத்துவிட்டாரோ என்று கேட்டிருக்கிறார் ஜெ.

________________________________________________________

முலாயம் சிங் ,கல்யான் சிங்,பால் தாக்கரே,ஜெயில் சிங்,ராஜ் நாத் சிங்,மன்மோகன் சிங்,ஜெயலலிதா எல்லோரும் உத்தரபிரதேச கிராமமொன்றில் ஒரு குடிசையில் வசிக்கின்றார்கள்.அவர்களின் தாய் சாப்பிட்டு மூன்று நாட்களாகிவிடது என்கிறார்.

48 வயதான மித்தாய் லால் பெயர் ராசியினால் தன் பிள்ளைகள் நன்றாய் வருவார்கள் என்ற நம்பிக்கையில் அவர்களின் பெயரை வைத்திருக்கிறார்.

இந்தியாவிலேயே மிகக் குறைந்த விலையில் கிடைக்க இருக்கிறது.,செயற்கை இதயம்!

2009-09-28T14:27:00.000+05:30

மனித இதயம் நான்கு அறைகளைக் கொண்டது.கரப்பான் பூச்சியின் இதயமோ 13 அறைகளைக் கோண்டது.இந்த அமைப்பினால் புவியில் அதிககாலம் தொடர்ந்து கொண்டிருக்கும் உயிரினமாக இருக்கிறது.இதை அடிப்படையாகக் கொண்டு ஐந்து அறைகள் கொண்ட செயற்கை மனித இதயத்தை, கரக்பூர் ஐ.ஐ.டி புரபஸர் சுஜாய் குஹா உருவாக்கியிருக்கிறார்

சோதனைகள் முடிந்து வெற்றி பெறும் தருவாயில் இருக்கும் முயற்சி கைகூடினால் மிகக் குறைந்த விலையிலும் இருக்கும்.அமெரிக்காவில் முப்பது லட்சங்களுக்கு கிடைகும் செயற்கை இதயமானது ஒரு லட்ச ரூபாய்க்கு கிடைக்கும்.

இன்றய நிலையில் ,உலக அள்வில் சுமார் இரண்டு கோடி பேர் செயற்கை இதயத்திற்கான தேவையுடன் உள்ளனர்.சுமார் முப்பது சதவீதத்தினரே தங்கள் தேவையை பூர்த்தி செய்து கொள்ள முடியும்.

சுஜாய் குஹாவினால் எண்ணற்றோர் பயனடைய வாய்ப்பு உள்ளது.

சமீப காலமாக இந்திய மருத்துவ சேவை சிறந்து வருகிறது. உலகத் தரம் வாய்ந்த அறுவை சிகிச்சைககள் இங்கு நடை பெறுகின்றன.சென்னை முக்கிய இடத்தை வ்கிப்பது குறிப்பிடப்படவேண்டியது.

எளிய மக்களுக்கும் எல்லாம் கிடைத்தால் நன்றாயிருக்கும்.தமிழக அரசின் இலவச மருத்துவ காப்பீடு திட்டம் நல்வரவாய் தெரிகிறது.வழக்கமான முறைகேடுகள் இன்றி மக்கள் பயனடைந்தால் பாராட்டலாம்.

சுழல்.

2009-09-28T11:50:00.000+05:30

ஆசை வளர்த்து
ஆசை அழித்து,

கனவில் உயிர்த்து
நினைவில் கொன்று,

இரவில் விழித்து
பகலில் சோர்ந்து,

வேளை மறந்து
வேலை செய்து,

உன்னை மறக்க
உன்னை நினைத்து

பார்க்க மறுத்து
மறுத்துப் பார்த்து,

பார்த்துப் பேசி
பேசியதை நினைத்து,

ஆசை வளர்த்து,
ஆசை அழித்து...